«Իշխանությունները պետք է մի բան հաշվի առնեն, որ Ժիրայր Սէֆիլյանը Գագիկ Ծառուկյան չէ, ոչ էլ Լֆիկ է, ոչ էլ ուրիշ բան է». Քաղաքագետ

Ազատամարտիկ Ժիրայր Սէֆիլյանի գլխավորած «100-ամյակը՝ առանց ռեժիմի» շարժումն իր շուրջօրյա հանրահավաքները սկսելու է ապրիլի 24-ից ՝ Ցեղասպանության 100-րդ տարելիցի օրվանից: Շատերը՝ թե՛ իշխանական, թե՛ ընդդիմադիր, կարծում են, որ այդ օրն ազգային սգո և համախմբման օր պետք է լինի, ու նպատակահարմար չէ, որպեսզի այդ օրը երկրի ներսում լինեն ինչ-որ գործընթացներ: Թեև շարժման կազմակերպիչները հայտարարում են, որ այդ օրը ոչ մի «խժդժություն» չի լինելու, և իրենք ընդամենը խաղաղ հավաք են անցկացնելու, սակայն իշխանության տարբեր ներկայացուցիչներ նշում են անգամ, որ անհրաժեշտ է կանխարգելիչ միջոցառումներ իրականացնել: Մասնավորապես, ՀՀԿ խմբակցության ղեկավար Վահրամ Բաղդասարյանն իր հարցազրույցներից մեկում խոսելով շարժման մասին՝ ասել էր, որ չի կարելի հանդուրժել այս ամենը. «Կարծում եմ, ժամանակն է՝ կանխարգելիչ միջոցներ ձեռնարկել, թույլ չտալ, որ իրենց հայ ժողովրդի զավակ, քաղաքական գործիչ հորջորջող մի խումբ արկածախնդիրներ ստվեր գցեն Ցեղասպանության հարյուրերորդ տարելիցին նվիրված միջոցառումների վրա։ Սա այն դեպքն է, երբ հանդուրժողականությունն արդարացված չէ»:

168.am-ի հետ զրույցում քաղաքագետ Լևոն Շիրինյանը խոսելով ապրիլի 24-ից սկսվող շարժման ակնկալիքների մասին՝ ասաց, որ մենք պետք է սովորենք օրենքի շրջանակում ապրել:

«Սահմանադրությունը թույլատրո՞ւմ է նման բան, չի արգելում, չէ՞, մնացածը բարոյականության հարց է՝ ես այս քայլը կանե՞մ, թե՞ չեմ անի: Ասենք, որևէ կոռուպցիոներ, որը Հայաստանը կեղեքում է, ասում է՝ ապրիլի 24-ին շարժում սկսելը ճիշտ չէ, ես ինչպե՞ս կարող եմ նրա խոսքը հասկանալ Ժիրայրի պարագայում, որն ազգային-ազատագրական հերոսներից է: Մնացածն իրենց հարցն է, եթե Սահմանադրության խախտման հարց չկա, սովետական ավանդույթի վրա պետք է թքել ու շպրտել»,- ասաց քաղաքագետը՝ ընդգծելով, որ բարոյական է այն, ինչ օրինական է, իսկ եթե կոռուպցիոներն է այդ բարոյականությունից խոսում, նրա ասածը Լ. Շիրինյանի համար ոչ մի արժեք չունի, որովհետև «երկիրն այդ կոռուպցիոներն է քանդում, ոչ թե Սէֆիլյանը»:

Հարցին՝ ոչ իշխանական եռյակի անհաջողությունից հետո ինչքանո՞վ է հավանական «Հիմնադիր խորհրդարանի» հաջողության հասնելը, Լ. Շիրինյանն այսպես պատասխանեց. «Հենց դա է, իշխանությունները մեծ սխալ թույլ տվեցին, ես այդ առիթն ունեցել եմ ասելու՝ «Բարգավաճը» քանդելը ճիշտ չէ: Ժամանակին այդ ուժն իրական ընդդիմություն դարձավ, որը քանդեցին, ստացան ռադիկալ ազգային ուժ, և նա ճանապարհ ունի: Իհարկե, թվաքանակը շատ չի լինի, ինչպես «Բարգավաճն» էր, որովհետև բոլոր կոռուպցիոներները, հայրենադավները, հայրենիքի կերպարը կորցրածները, բոլորն այդ շարժմանը դեմ են լինելու, բայց բոլոր նրանք, ովքեր Արցախում արյան գնով հայրենիք էին պաշտպանում, նրանք լինելու են Ժիրայրի հետ: Այսինքն՝ իշխանությունն իր քաղաքական անհասկացողությամբ՝ ստացավ ռադիկալ, արմատական ընդդիմություն»:

Մեր ճշտող հարցին՝ «Հիմնադիր խորհրդարանի՞ն» նկատի ունեք՝ ասելով՝ արմատական ընդդիմություն, քաղաքագետն այսպես պատասխանեց. «Անշուշտ, նրան ո՛չ փողով կգնես, ոչ՛ կարող ես վախեցնել: Ժիրայրին չեն կարող, նա այն մարդը չէ, որ իրեն մի հատ Արմավիրը նվիրես՝ լռի: Ուզում եմ ասել՝ ստացան մեկին, որը Հայաստանի ազգային շահի ներկայացուցիչն է»:

Լ. Շիրինյանը կարծում է՝ իշխանությունը չի կարող Վահրամ Բաղդասարյանի ասած այդ «կանխարգելիչ» միջոցները կիրառել, որովհետև աշխարհի ուշադրությունը սևեռված է Հայաստանի վրա. «Իսկ քանի որ այդպես է, այդ ռեպրեսիաներն այն ձևով չեն լինի, դրա համար դանակ խփող, քար նետող պետք է գցեն մեջները, այսինքն՝ ուրիշ բան առայժմ չեն կարող անել»:

Քաղաքագետի խոսքով՝ իշխանությունները պետք է մի բան հաշվի առնեն, որ Ժիրայր Սէֆիլյանն Արցախյան ազատամարտի այն հրամանատարներից է, որը փայլուն տիրապետում է ստրատեգիայի և տակտիկայի սկզբունքներին. «Իշխանությունների համար նա Գագիկ Ծառուկյան չէ, ոչ էլ Լֆիկ է, ոչ էլ ուրիշ բան է: Նրանք ուրիշ տեսակ հայեր են, որոնք մեր երկրի համար այն գլխից կռվելով գալիս են»:

Հարցին՝ «Հիմնադիր խորհրդարանին» ռադիկալ ո՞ւժ եք համարում, Լ. Շիրինյանն այսպես պատասխանեց.

«Ոչ թէ ռադիկալ, այլ ազգային ուժ է: Ինքը որ ասում է՝ շարժում է, ճիշտ է ասում, նա կուսակցություն չէ, այսինքն՝ մի բան է, որը կարող է և ռադիկալ ընդդիմություն լինել՝ իշխանություն գրավելու համար, բայց նրանք իշխանության համար չեն անում դա: Նրանք հայրենիքի համար են անում: Այսպես ասենք, ազգային իրական ուժ է, բայց ուժեղ ուժ է, քիչ են՝ կշատանան: Լևոնն էլ էր ռադիկալ, բայց նա գալիս էր իշխանության, որ ինքը նախագահ դառնա, ոչ թե Հայաստանում կոռուպցիա չլինի, իսկ սրանք հայրենիք են ուզում, հայրենիքի վերածնունդի ուժ են»:

Հարցին էլ՝ ի՞նչն է պատճառը, որ ոչ միայն իշխանությունները, այլև ընդդիմադիր շատ գործիչներ և ուժեր էլ են քննադատում «Հիմնադիր խորհրդարանին», քաղաքագետը պատասխանեց, որ դրանք «նոմենկլատուրային» ընդդիմություն են. «Իրենք էլ են այս ռեժիմով պայմանավորված ընդդիմություն: Նրանք, ովքեր այդպես մեծ-մեծ խոսում են, սեփականաշնորհել են Դաշնակցության անունը, ծրագիրը, բայց իշխանությունների հետ քննադատելով՝ լավ էլ ապրում են, սրանք, պարզ չէ՞, որ չեն ուզենա նման ուժի վերադարձ»:

Մեր ճշտող հարցին՝ այսինքն՝ նրանք գիտակցո՞ւմ են, որ «Հիմնադիր խորհրդարանն» իրենից իրական, ազգային ուժ է ներկայացնում, ու հենց նրանց համար էլ կարող է վտանգ ներկայացնել, դրա համար էլ դե՞մ են արտահայտվում «100-ամյակը՝ առանց ռեժիմի» շարժման մասին, Լ. Շիրինյանն այսպես պատասխանեց. «Անշուշտ: Իրենց շահն իշխանության հետ է»:

Քաղաքագետից հետաքրքրվեցինք նաև, թե ըստ նրա՝ ինչպիսի՞ն կլինի արտաքին ուժերի վերաբերմունքը «Հիմնադիր խորհրդարանի» շարժման հետ կապված: Ի պատասխան՝ նա կարծիք հայտնեց, որ արտաքին ուժերը շարժմանը դեմ կլինեն. «Եթե իսկապես կա որևէ երկիր, որն ուզում է՝ վերականգնվի Հայաստանի պետականությունը, քաղաքակրթությունն ու մշակույթը, նա կլինի «Հիմնադիր խորհրդարանի» հետ, բայց այդպիսի պետություններ չկան, որ ուզենան՝ հզոր, իրական պետություն առաջացնեն»:

Հարցին էլ՝ ինչքանո՞վ հաջողություն կունենա շարժումը, քաղաքագետը պատասխանեց, որ կարծում է՝ կունենա հաջողություն՝ «մանավանդ, եթե կարողանան իրենց խոսքը երիտասարդության ուղեղը գցել». «Եթե ուսանողությունը շարժվեց, ի՞նչ են անելու իշխանությունները»:

Լ. Շիրինյանի կարծիքով՝ «Հիմնադիր խորհրդարանի» անդամները հզոր, մշակութային մարդիկ են, նրանցից ոչ մեկը կոռուպցիոներ չէ, դրա համար նրանցից վախենում են. «ինչպես՝ իշխանությունը, այնպես էլ՝ իշխանությունով պայմանավորված ընդդիմությունը»:

«Սփյուռքում էլ Ժիրայր Սէֆիլյանի նկատմամբ մեծ համակրանք կառաջանա: Այդ Արմեն Ռուստամյանը, որ այդպես խոսում է, նա վախենում է՝ այնտեղ Դաշնակցության շարքերն էլ ընկնի այդ շարժումը, որովհետև Ժիրայր Սէֆիլյանը Դաշնակցության հերոսներից է»,- նկատեց քաղաքագետը: