ԵՏՄ-ում երկաթուղային ընդհանուր ցանցի ներդրման քննարկմանը «Հարավկովկասյան երկաթուղիները» առայժմ չի մասնակցում
Եվրասիական տնտեսական միության (ԵՏՄ) շրջանակներում «Ռուսական երկաթուղիներ» ՓԲԸ-ի կողմից առաջարկվել է մի նախագիծ, որով անդամ երկրների երկաթուղային փոխադրումներ իրականացնող ընկերությունները, իրենց կանոնադրական կապիտալը ներդնելով, կունենան ուղևորափոխադրումների ընդհանուր ցանց: Այս մասին 168.am-ի հետ զրույցում հայտնեց Կապի և տրանսպորտի նախարարության Երկաթուղու վարչության պետ Արսեն Մկրտչյանը:
Բացելով փակագծերը՝ պաշտոնյան նշեց, որ ԵՏՄ բազայի հիման վրա ստեղծված միասնական երկաթուղային, տրանսպորտային լոգիստիկ կազմակերպությանն անդամակցելու վերաբերյալ «Հարավկովկասյան երկաթուղիներ» ընկերությունն առայժմ իր դիրքորոշումը չի արտահայտել և քննարկումներին չի մասնակցում:
«Նման նախագծերն աշխատող են, կոնկրետ այս դեպքում դիտարկելով բոլոր անդամ պետությունների մասնակցությունը, հասկանում ենք, որ ամենատեսանելի օգուտը կարող է քաղել Հայաստանը: Ժամանակի ընթացքում հայկական կողմը ստիպված է լինելու միանալ այս նախաձեռնությանը»,- նշեց Մկրտչյանը:
Նրա խոսքով, այս նախագիծը կարևոր է ոչ միայն ուղևորափոխադրումների ընդլայնման աշխարհագրության տեսանկյունից, այլ նաև սակագների, քանի որ միության անդամ երկրներում գործելու է ընդհանրացված և համեմատաբար մատչելի սակագին:
Անդրադառնալով վրացական կողմի հետ երկաթուղու վերաբացման քննարկումներին, վերջինս նշեց, որ հայկական կողմը պասիվ չէ, և հարցը տարբեր ձևաչափերով քննարկվում է, պարզապես պետք է հաշվի առնել վրացի գործընկերների դիրքորոշումը. «Վրացիներին հետ են պահում քաղաքական, հայրենասիրական նկատառումները, սակայն արդեն մի քանի անգամ երկաթուղայինների կողմից նշվել է, որ տեխնիկապես երկաթուղու բացման հարցը մի քանի ամիս կարող է տևել, խնդիրը շարունակում է մնալ քաղաքական դաշտում»:
Ինչ վերաբերում է ոլորտի խնդիրներին, Մկրտչյանը նշեց, որ հիմնական խնդիրը շարժակազմի մաշվածությունն է, որոնք նորերով փոխարինելու հնարավորություններ դեռ չկան, և այս խնդիրն առկա է գրեթե բոլոր հետխորհրդային երկրներում:
Չնայած այս և մի շարք առկա խնդիրներին՝ ոլորտի ներկայացուցիչը տեղեկացրեց, որ վերջին շրջանում հայկական գնացքին տվել են ֆիրմային՝ «Արմենիա» անվանումը. այն վկայում է, որ մեր երկաթուղու ծառայությունները համապատասխանում են ընդունված չափանիշերին, և ծառայությունների որակն էլ գնալով բարելավվում է:
Մեզ հետ զրույցում «Հարավկովկասյան երկաթուղիներ» ընկերության տեղեկատվական կենտրոնի պետ Նելլի Շուշանյանը հայտնեց, որ այսուհետ հայկական երկաթուղու աշխատանքը վերահսկվելու է օնլայն համակարգի միջոցով: Մասնավորապես, արդեն հնարավոր կլինի հետևել, թե գնացքը որ տարածքում է, ինչ շարժակազմով է, ինչ ծանրաբեռնվածությամբ, և այլն:
«Նախկինում մոնիտորինգներ էին անցկացվում ամսական մեկ կամ, լավագույն դեպքում, երկու անգամ, այս նոր համակարգի միջոցով մենք կարողանում ենք ամեն օր հետևել գնացքների ուղղություններին, տեխնիկական վիճակին, սպասարկող անձնակազմին և այլն: Օնլայն տարբերակով մենք կարողանում ենք հետևել նաև այլ երկրներից Հայաստան փոխադրումների ընթացքին»,- հայտնեց Շուշանյանը:
