Մադոննայի «Living for love» քլիպի բյուրեղաքար դիմակների հեղինակը՝ Մարիաննա Հարությունյան
2014 թվականի Գրեմմի երաժշտական մրցանակաբաշխությանը աշխարհահռչակ երգչուհի Մադոննան յուրատեսակ պարային համարով ներկայացրեց իր նոր՝ «Living for love» երգը:
Պարային ներկայացման մեջ ներգրավված էին մի խումբ տղամարդիկ՝ ցուլի եղջյուրներով և արծաթափայլ դիմակներով։ Եղջյուրների հեղինակը բեմական աքսեսուարների հայտնի դիզայներ Մալակայի Հոմն (Malakai Hom) է, իսկ բյուրեղյա դիմակների հեղինակը՝ հայազգի դիզայներ Մարիաննա Հարությունյանը։
Ավելի քան 30 տարի ԱՄՆ-ում բնակվող Մարիաննան արդեն հասցրել է համագործակցել աշխարհահռչակ փոփ երգիչներ Փինկի, Շերի, Նիքի Մինաժի, Ջասթին Բիբերի, Լեդի Գագայի և այլոց հետ։ Այն, որ հայազգի դիզայներն արդեն աշխատում է նաև Մադոննայի հետ, պարզ դարձավ փետրվարի 6-ին հրապարակված դիմակների լուսանկարից: «Ես սա պատրաստել եմ թագուհի Մադոննայի համար՝ իմ լավ ընկեր, ոճաբան Բեն Ակերլանդի օգնությամբ։ Ինձ օրհնված և երջանիկ եմ զգում»,- գրել է Մարիաննան։
168.am-ի հետ զրույցում Մարիաննան պատմեց, որ Բեն Ակերլանդը խնդրել է իրեն ամբողջովին բյուրեղիկներով պատված դիմակներ պատրաստել։
«Աշխատանքը շատ բարդ էր, քանի որ ես հինգ օրում պետք է պատրաստեի 22 դիմակ։ Այդ օրերին ինձ «փրկեց» սուրճը»,- մեզ հետ զրույցում ասաց դիզայները։
Ակերլանդը Մարիաննային պատմել է Մադոննայի նոր տեսահոլովակի և երգի պատմությունը, և նրանք երկուսով համագործակցելով՝ ստացել են այդ դիմակները։ «Մադոննան մեծագույն աստղերից է, և ես միշտ երազել եմ նրա համար աշխատել։ Հնարավոր է՝ շուտով ես պատրաստեմ ինչ-որ բան հենց իր համար։ Սա կյանքիս ամենահետաքրքիր փորձառություններից էր»,- ասաց Մարիաննան։
Մարիաննան սկսել է զարդեր պատրաստել դեռևս 5 տարեկանից և երբեք մտքով չի անցկացրել իր հոբբին վերածել աշխատանքի։ Նա ինքնուսույց է, ոչ ոք նրան չի սովորեցրել աքսեսուարներ ստեղծել։ Հայազգի դիզայները պատրաստում է վզնոցներ, ապարանջաններ, ականջօղեր, մատանիներ, եղունգների համար նախատեսված զարդեր, մազակալներ, դիմակներ, բեմական տարբեր զարդեր։ Նա իր առաջին խանութը բացել է 1999 թվականին։ Իսկ այսօր նա etsy.com կայքում ունի իր օնլայն խանութը, որտեղից բոլորը կարող են գնումներ կատարել։ Մարիաննայի աշխատանքների արժեքները տարբեր են՝ 12 դոլարից մինչև 80 դոլար: Նա նաև Լոս Անջելեսում ունի սրահ, որտեղ ցուցադրում է իր աշխատանքները։
Այս օրերին Մարիաննա Հարությունյանը զարդեր է պատրաստում ամերիկացի դերասանուհի, երգչուհի-երգահան Արիանա Գրանդեի համար, նաև աշխատում է Դիսնեյ Հոնգ Կոնգի և «Դիսնեյլենդի» համար՝ կերպարների համար նախագծելով և պատրաստելով զարդեր։
«Մադոննայի հետ համագործակցելուց հետո իմ ցանկությունն է ՝շատ աշխատել, շատ ստեղծել և սկսել անել ուրիշ բան՝ օրինակ, իմ զարդերը ներգրավել նորաձևության հավաքածուներում»,- ամփոփեց հայ դիզայները։
