Լատվիայի ջրային սահմանների մոտ ռուսական մարտական ինքնաթիռներ ու ռազմանավեր են հայտնաբերվել
Լատվիական Delfi լրատվական գործակալության փոխանցմամբ` երեկ Բալթիկ ծովում` Լատվիայի տարածքային ջրերից ոչ հեռու, նկատվել է ռուսական չորս ռազմանավ և չորս ինքնաթիռ: Այս մասին հայտարարել են Լատվիայի զինված ուժերը:
ՆԱՏՕ-ի պարեկային ինքնաթիռները նկատել են ռուսական Ту-22M գերձայնային ռազմավարական երկու ռմբակոծիչի ու դրանց ուղեկցող Су-27 տիպի կործանիչների: Լատվիայի զինված ուժերը երկրի տարածքային ջրերից 23 ծովային մղոն հեռավորության վրա հայտնաբերել են «Կիլո» սուզանավն ու «Զելենդոլսկ» հակասուզանավային նավը, իսկ 13 ծովային մղոնի վրա` СС 750 հակասուզանավային նավն ու GS 403 հիդրոգրաֆիկական նավը:
Վերջին շրջանում ռուսական մարտական ինքնաթիռները, ռազմանավերն ու սուզանավերը կանոնավորապես մոտենում են լատվիական սահմաններին: ՆԱՏՕ-ի երկրներն ուժեղացրել են Բալթյան երկրների օդային տիրույթի պարեկությունը, ինչին ներկայումս մասնակցում է 12 կործանիչ` չորսական լեհական, բրիտանական ու դանիական:
Սեպտեմբերի 1-ից Բալթյան երկրների օդային տիրույթում 4 ամսով պարեկություն են կատարելու Պորտուգալիայի, Կանադայի, Գերմանիայի ու Նիդերլանդների ռազմաօդային ուժերը:
